ရင်ခွင်မဲ့ ငှက်တစ်ကောင်ရဲ့ တောင်ပံခတ်သံများ

အမှတ်တရရှိခဲ့တဲ့ China နေ့ရက်များ

တဖျောက်ဖျောက်နဲ့ ကြွေကြလာတဲ့ မိုးစက်တွေကိုကြည့်ရင်း....

သြော်...ဘာမှ မကြာလိုက်သလိုပါပဲလား..

ရာသီစက်ဝန်းတစ်ပတ်လည်လို့ မိုးစက်တွေတောင် ကျွန်တော့်နံဘေးမှာ အဖော်အဖြစ်ရှိနေခဲ့ပြန်ပြီ...။ တကယ်တော့ အေးမြလှတဲ့ မိုးစက်တွေရဲ့အောက်မှာ ကျွန်တော်ဟာ ခိုက်ခိုက်တုန်ရှိနေသင့်တာပါ..

ဒါပေမယ့် အဲဒီအေးမြမှုကို အံတုပြီး ဟိုးခပ်ဝေးဝေးက September ရဲ့နေရောင်တွေအောက်က သူငယ်ချင်းနှစ်ယောက်ကို ပြန်မြင်ယောင်နေခဲ့မိတယ်...
ခပ်ပေပေ ခပ်တေတေနေလာခဲ့တာလဲ နှစ်လကျော်သွားပြီ..

ငါ ဒီကို ဘာအတွက်ရောက်လာခဲ့သလဲ ဆိုတဲ့အတွေးတွေကြားမှာ ကျွန်တော်ဟာ ကွန်ပြူတာရှေ့ငုတ်တုတ်ထိုင်ပြီး ဟိုဟိုဒီဒီ အချိန်တွေဖြုန်းနေရုံပါပဲ...

ဒီလိုနဲ့နေလာခဲ့တာ ကောင်မလေးတစ်ယောက်နဲ့သူငယ်ချင်းဖြစ်လာခဲ့တယ်..

အဲဒီကောင်မလေး ရင်ထဲကိုရောက်လာခဲ့လိမ့်မယ် လို့မထင်ခဲ့မိဘူး..

အခုချိန်မှာတော့ အမှတ်တရ China နေ့ရက်များအကြောင်းပြန်ပြောရင်တော့

အဲဒီကောင်မလေးက မပါမဖြစ်ပါ..

လိုအပ်ချိန်တိုင်း မဟုတ်တောင် တမ်းတလိုက်တိုင်းမှာ သူရှိနေတတ်တာပါ..

တစ်ကယ်တော့ ရိုးရိုးလေးပဲ ခင်ခဲ့တာပါ .

ဒါပေမယ့် ကျွန်တော့်ဘက်က သာမန်ထက်ပိုခဲ့တာကိုတော့ ရင်ထဲမှာ တိတ်တိတ်လေးပဲထားခဲ့ပါတယ်.. ဒါလေးတွေကတော့ ကျွန်တော့်စိတ်ဓာတ်တွေ အကြီးအကျယ်အောက်ပြုတ်ကျတုန်းကပေါ့...

သူပေးခဲ့တဲ့ အားပေးစကားတွေ......သူရဲ့ကျွန်တော့်အပေါ် နားလည်ပေးတာတွေ...

ဒါတွေကို ဖော်ညွှန်းတဲ့ Powerpoint လေးတွေလည်းကျွန်တော်ရခဲ့ဖူးတယ်..

Internet မှာအလွယ်တကူရှာချင် ရှာနိုင်ပေမယ့်

ကျွန်တော့်အတွက်တော့ ဘယ်မှာမှ ရှာမရနိုင်တဲ့အရာတွေလို တန်ဖိုးထားခဲ့တာပါ..

ဒီလိုနဲ့ ၂၀၀၇ ကလဲ လက်ပြထွက်ခွါတော့မယ့်ဆဲဆဲ ၂၀၀၈ ရဲ့ New Year ညမှာပေါ့. ခပ်သော့သော့လေပြေက ကလူဧ။်သို့ မြူဧ။်သို့လေ...

တစ်ခါမှ New Year ကိုမဆင်နွှဲခဲ့ဖူးပါဘူး..

ဒါပေမယ့် အခုချိန်မှာတော့ ရင်ခုန်စောင့်စားရင်းနဲ့

တရုတ်ပြည်စံတော်ချိန် ၂၄:၀၀ ရဲ့ ၅ မိနစ်အလိုမှာ " Happy New Year " ကို

သူနဲ့အတူ ကြည်နူးမှုတွေပိုက်ပြီး လေလှိုင်းတွေထဲကတဆင့် ဆင်နွှဲခဲ့ပါသေးတယ်..

ဘယ်တော့မှ မမေ့နိုင်တဲ့ အမှတ်တရနေ့ရက်တွေထဲက တစ်ရက်ပါပဲ..

နှစ်သစ်ကိုဝင်လာပြီး ချမ်းစိမ့်လှတဲ့တရုတ်ပြည်ရဲ့ ဆောင်းရာသီဒဏ်ကိုခံရပြန်ပြီ...

မကြာခင်မှာ ကျွန်တော့်မွေးနေ့လေးလာတော့မယ်..

ပုံမှန်မရှိတဲ့ နှင်းတွေကို ကျွန်တော့်မွေးနေ့မှာ ကျစေချင်ပြန်ရော..

အရမ်းအံ့သြဖို့ကောင်းတာက တစ်ပတ်လောက်မကျတဲ့ နှင်းတွေက...

January 17th ရဲ့မနက်စောစောမှာ ပတ်ဝန်းကျင်မှာ ဖွေးဖွေးလှုပ်နေပြီ...

ဒီပုံလေးကတော့ ကျွန်တော့်မွေးနေ့မှာ တိုက်တိုက်ဆိုင်ဆိုင်တွေ့ရတဲ့ နှင်းတွေ ဖြန်းပက်ထားတဲ့ ကျွန်တော်တို့ပတ်ဝန်းကျင်ဓာတ်ပုံတစ်ချို့ပါ...

တစ်ကယ်ကို ၀မ်းသာတာတစ်ခုကတော့...

ဒီနေ့မအားဘူး လို့ပြောထားတဲ့သူ့ဆီက သူ့နှုတ်ဖျားကနေ

" Birthday Wish" ကို နွေးထွေးစွာ ရရှိခဲ့တာပါပဲ...

ဒါကတော့ သူပေးခဲ့တဲ့ Birthday Wish ပါတဲ့ ကဒ်လေးပါ...

ဒီလိုနဲ့ မမြင်နိုင်တဲ့ သံယောဇဉ်တွေကြားမှာ...ကျွန်တော်တို့ ပျော်ခဲ့ကြတယ်..
အကောင်းအဆိုးမခွဲခြားပဲ မျှဝေခံစားပေးခဲ့ကြတယ်..

ပြီးတော့ ရက်ကို လစား..လကို နှစ်တွေက မြိုချလိုက်ပြီထင်ပါ့..

ကျွန်တော်တို့ ဝေးကွာသွားကြပြီလား...

မျဉ်းပြိုင်နှစ်ကြောင်းပေါ် ရောက်သွားတာကြပြီလား ဆိုတာ မသိတော့ပါဘူး...

ဒါပေမယ့် ကျွန်တော် ယုံကြည်ပါတယ်...

သံသရာစက်ဝိုင်းပေါ်က ကျွန်တော်တို့နှစ်ယောက် ကမ္ဘာမြေရဲ့တစ်ထောင့်တစ်နေရာမှာတော့ ပြန်ဆုံကြရမယ် ဆိုတာကိုပါ...အရင်လို နွေးထွေးမှုတွေကိုလည်း ပြန်ရချင်ပါသေးတယ်...

နှစ်တွေ ဘယ်လောက်ပြောင်းပြောင်း...

တစ်ယောက်တစ်နေရာဆီ ဘယ်လောက်ပင် ဝေးကွားပါစေ

ကျွန်တော့်ရင်ထဲမှာ အဲဒီ့ကောင်မလေး ရှိနေမှာပါ...

ကျွန်တော့်ကို အားပေးတတ်သော...........

ညင်သာတဲ့ စကားလုံးတွေနဲ့ နှစ်သိမ့်ပေးခဲ့သော......

နူးညံ့တဲ့ စိတ်ထားတွေကို ပိုင်ဆိုင်သော.........

သူတစ်ပါးခံစားချက်ကို နားလည်ပေးတတ်သော....

တစ်ခါတစ်လေမှာ စိတ်ကောက်တတ်သော....

ဒီလိုမျိုးလေးတွေနဲ့သူက ကျွန်တော်အလိုချင်ဆုံးကိုလည်း ပေးခဲ့ပါသေးတယ်...ဒါဟာ အကြီးမားဆုံးဆုလဒ်တစ်ခု မဟုတ်တောင် နှစ်သိမ့်ဆုလေးဖြစ်ခဲ့ရင်တောင်မှ

ကျွန်တော် ကျေနပ်နေမှာပါ....
ရင်ထဲမှာလဲ တစ်သက်လုံးကျန်နေခဲ့မှာပါ....

" u r someone who understand on me "

ကြေကွဲခြင်း

ချစ်သူရေ
မင်းရဲ့အပြုံး မိုးတစ်စက်
ငါ့နှလုံးသား ပျိုးခင်းထက်ကို
ဘယ်တော့များမှ ဖျန်းပက်မှာလဲ

မကြင်နာချင်နေပါ
ရင်တော့မနာပါရစေနဲ့
မချစ်ရင်လည်းနေပါ
ပစ်ခွာတော့ မပြေးပါနဲ့
နှုတ်ဆိတ်လို့နေချင်နေပါ
အမုန်းတော့ တဆိတ်မကြားပါရစေနဲ့
နှလုံသားကို တံခါးပိတ်ကြိတ်မှိတ်လို့ နေပါ့မယ်
သနားတယ် ဆိုတဲ့စကား
ငါ့နားမှာ ခါးလွန်းလို့ပါ

မျဉ်းပြိုင်နှစ်ကြောင်းလို
မင်းနဲ့ငါ့ရဲ့အချစ်အကြောင်း
ဘယ်အခါမှ မပြောင်းလဲပေမယ့်
ထာဝရတိုင်အောင်လည်း
မပေါင်းဆုံနိုင်ပါဘူးလေ

နယူတန်ရဲ့နိယာမတရား
သက်ရောက်မှု့အတွက်
တန်ပြန်သက်ရောက်ခဲ့လို့
လားရာတွေ...ဆန့်ကျင်ခဲ့ရတယ်
ငါ့ရဲ့အပြုံးက...မင်းအတွက် အမုန်းတွေဖြစ်လို့

ငါ့ရင်လည်း...ကွဲကြေခဲ့ရတယ်......။

အပင်ပျိုးခဲ့မိတာ
အကျိုးလိုလို့ မဟုတ်ပါဘူး
ငါ့ရင်ဘတ်ထဲက ပန်းတစ်ပွင့်
မင်းအတွက် ရနံ့မသင့်ခဲ့ရင်တောင်
ထာဝရတိုင်အောင် ယုယလို့နေဦးမှာပေါ့

သတိရခြင်းတွေ ပိုင်စိုးတဲ့ည

နေ့နေ့ညည မင်းအကြောင်းတွေး
စိတ်ကူးလေးတွေ ယဉ်နေမိတယ်
သတိရတိုင်း လွမ်းဆွေးလို့
ကဗျာလေးတွေလည်း ရေးနေမိတယ်
ခြေနေမပေး တနယ်စီဝေးပေမဲ့
ချစ်သူရေ.............အိပ်မက်တိုင်းမှာမင်းရှိတယ်ကွဲ့ ...။

ဘယ်လောက်ပဲဝေးဝေးပြေးခဲ့လည်း
ကိုယ့်စိတ်ထဲကိုယ်တော့..ရုန်းမထွက်နိုင်ခဲ့ပါဘူး
သတိရတယ်ဆိုတာ....တိုက်ဆိုင်လို့တဲ့
နင့်ကိုမလွမ်းမိအောင်တော့
အသည်းအသန်ကြိုးစားနေရတယ်.....ကောင်မလေးရေ
နားထဲရောက်လာတဲ့ အသံတွေကရော.....နင့်အသံနဲ့တူလိုက်တာ
မျက်စိတောင်မမှိတ်ရဲတော့ဘူး.......နင့်မျက်နှာတွေဝဲ၀ဲလာလို့
သတိရစိတ်နဲ့အိပ်မက်ညတွေထဲ......မင်းပုံရိပ်ပဲစိုးမိုးဆဲမို့
မိုးလင်းသွားမှာတွေးကြောက်မိတယ်..။

အတ္တများနဲ့ ဥယျာဉ်မှူး

ဥယျာဉ်မှူးဆိုတာ...ရက်စက်တတ်သူ လို့ကျွန်တော်မကြားဖူးပါဘူး..
ကိုယ်တိုင်ပြုစုပျိုးထောင်ပေးတဲ့ပန်းတွေကို ဝေေ၀ဆာဆာဖြစ်အောင် လုပ်ချင်ကြတာ
ဥယျာဉ်မှူးအတော်များများရဲ့ ဆန္ဒတစ်ခုပဲ လို့ကျွန်တော်ထင်ပါတယ်..

ရင်က ပွင့်တဲ့ပန်းမို့ တယုတယရေလောင်းပေါင်းသင်းပေမယ့်

ရင်ခွင်မဲ့ပန်းကျတော့ ဥပေက္ခာပြုလျစ်လျူရှူ့တာ မကောင်းပါဘူး..

အသီးအပွင့်ကို မခံစားချင်ရင်တော့ မျိုးစေ့ကို အစမပျိုးပါနဲ့..

အညွန့်တွေ ဖြာတက် မိုးပေါ်တိုးထွက်တော့မှ အညွန့်ဆိတ်တာတော့

အကြင်နာမဲ့နှလုံးသားပိုင်ရှင် ဥယျာဉ်မှူးရဲ့ အတ္တဆန်ဆန်ထိုးနှက်ချက်ထင်ပါရဲ့....

ဥာဏ်ပညာဆိုတာ လောကဖွံ့ဖြိုးတိုးတက်မှုရဲ့ ဥသျှောင်တဲ့..။

တကယ်ဟုတ်ခဲ့သည်လား....မဟုတ်ခဲ့သည်လား ဆိုတာ

ဒီဥယျာဉ်မှာ ကြီးပြင်းလာတော့မှ

ကျွန်တော့်စိတ်တွေ တွေဝေနေခဲ့ရပြီ...

သာယာလှပတဲ့ ဥယျာဉ်ကိုတည်ဆောက်ချင်ရင်တော့

ပေါက်ပန်းလို အဆင်းသာရှိ အချင်းမရှိတဲ့ပန်းတွေနဲ့ ဖြစ်နိုင်လိမ့်မယ် မထင်မိဘူး..

အဆင်းလဲရှိ ရနံ့ပါမွှေးတဲ့ပန်းတွေနဲ့ဆို

ဥယျာဉ်ကြီးရော လောကကြီးပါ ပိုပြီးတော့ မသာယာ မလှပလာနိုင်ဘူးလား..

နောက်ဆုံးတော့လည်း

အတ္တကြီးတဲ့ ဥယျာဉ်မှူးရဲ့ မျိုးစေ့ချ ပျိုးထောင်ခံခဲ့ရတာ ကံဆိုးခဲ့တာပါပဲ..

သီးချိန်တန်သီး ပွင့်ချိန်တန်ပွင့်တာ ပန်းတွေရဲ့သဘာဝဖြစ်ပေမယ့်

အညွန့်တွေဝေဆာ အဖူးအငုံတွေထွက်လာတော့မှ

အတက်ကို ဆိတ် အခက်ချိုးခံရတာ

ဒီဥယျာဉ်တစ်ခုမှာပဲ ကျွန်တော်တွေ့ဖူးတယ်..

တကယ်ပါဗျာ....

ဆုတောင်းတွေသာ ပြည့်ခဲ့မယ်ဆိုရင်

ပြင်ဆင်ခွင့်တွေသာရခဲ့မယ်ဆိုရင်

" အတ္တကြီးတဲ့ ဥယျာဉ်မှူးရဲ့ ဥယျာဉ်မှာ မျိုးစေ့အဖြစ် ကျဲချခံရခြင်းမှ ကင်းလွတ်ရပါစေ "

လို့ဆုတောင်းမိမှာပါဗျာ...

လွဲမှားနေတဲ့ ခြေလှမ်းများ

သြော်...တရွေ့ရွေ့စားလာတဲ့အချိန်များအောက် ငါဘာများဖြစ်လာပြီလဲ

ဆိုတဲ့အတွေးတွေက စိုးတထိတ်ထိတ်နဲ့ဝင်လာခဲ့ပြီ..
ဟိုးခပ်လှမ်းလှမ်းကို မျှော်ကြည့်လိုက်ရင်ပဲ

ဆူညံနေတဲ့ မြို့ပြက ကားဟွန်းသံ လူသံတွေက
ကျွန်တော်ကို တဖန်ပြန်စောင်းကြည့်သေးတယ်...
ဒီလိုနဲ့.....လျှောက်လာခဲ့တယ်.....
ခြေလှမ်းရဲ့ ဦးဆောင်ရာနောက်မှာ ခန္ဓာကိုယ်ကြီးဟာလည်း

ယက်ကန်ယက်ကန်နဲ့ လိုက်ပါခဲ့ပါလေရော...

လူ့သက်တမ်းရဲ့ သုံးပုံတစ်ပုံအလွန်က
ရာစုဟောင်းတွေမှာ အကောင်းမဖြစ်ခဲ့သလို ရာစုသစ်တွေဆီကိုလည်း
ယောင်လို့တောင် မမှန်းကြည့်ရဲသေးဘူး...
လေလွင့်နေတဲ့ စွန်လေးလို

ပဲ့ထိန်းရာ လေနှင်ရာ
ကောင်းကင်ထက်မှာ တလူလူတော့ လွှင့်တက်နေလေရဲ့...
ဒါပေမယ့်

ငါဟာ ဘာမှမဟုတ်သေးပါလား ဆိုတဲ့အတွေးလေးသာ
ခေါင်းထဲမှာ ရေးတေးတေး ကျန်ခဲ့တယ်...

ဘာလိုလိုနဲ့...၀င်ကစွပ်ကောင်လိုပါပဲ...
သူများခန္ဓာအငှားနဲ့ အသက်ဆက်နေရတဲ့ ဘ၀ကို ပြန်လက်ခံရတော့မယ်...
တကယ်တော့ ခံယူချက် အတွေးအခေါ်မတူတဲ့လမ်းတွေပေါ်မှာ
လျှောက်ရတာ ပင်ပန်းလွန်းလှပါတယ်..
တစ်ခါတစ်လေမှာတော့ ငါဆိုတာ ငါမှန်းတောင်မသိလောက်အောင်ပါပဲ...
အာဃာတတွေ အငြိုးတွေမရှိဘဲနဲ့
မင်းဘာကောင်လဲ ငါဘာကောင်လဲ ဆိုတဲ့ အသိုင်းအ၀ိုင်းဆီကနေ
ပြေးထွက်ချင်လိုက်တာ...

တစ်ကယ်တော့

ငါလေ မှားမှန်းမသိမှားခဲ့တာပါ...
ဒါပေမယ့်လည်း....ငါဆက်လျှောက်ရအုံးမယ်....
ဘယ်အချိန်တွေအထိ ငါဆက်လျှောက်ရအုံးမလဲ ငါမသိဘူး....

'' ခြေလှမ်းတွေမှာ မျှော်လင့်ခြင်းတွေတော့ မဲ့နေလေရဲ့.....
ငါ....ဆိုတဲ့အတ္တဆီကနေ ခပ်ဝေးဝေးမှာ နေရာယူနေလေရဲ့........''
....................................................................................
...................................................................................
" အို...အသင်လောကကြီး.......သင်သာတတ်နိုင်ခဲ့ရင်....
ငြိမ်းချမ်းသော ကမ္ဘာဆီ ခြေလှမ်းတွေကို ဦးတည်ခွင့်ပေးပါ...
လွဲမှားနေတဲ့ခြေလှမ်းတွေကို ပြင်ဆင်ခွင့်ပေးပါ..
ခြေလှမ်းတိုင်းမှာ ယုံကြည်မှုအပြည့်ပေးပါဗျာ....''

ရင်ခွင်မဲ့ ငှက်တစ်ကောင်ရဲ့ တောင်ပံခတ်သံများ

စိတ်ကူးတဲ့ရာ ဟိုဟိုဒီဒီ

ဝေဖန်အကြံပြုပေးပါဗျာ

ဘာတွေရေးထားပြီလဲ

အမှတ်တရရှိခဲ့တဲ့ China နေ့ရက်များ

ကြေကွဲခြင်း

သတိရခြင်းတွေ ပိုင်စိုးတဲ့ည

အတ္တများနဲ့ ဥယျာဉ်မှူး

လွဲမှားနေတဲ့ ခြေလှမ်းများ